Sir 46

1 ⲓⲏⲥⲟⲩⲥ ⲡϣⲏⲣⲉ ⲛⲛⲁⲩⲏ ⲡϫⲱⲱⲣⲉ ϩⲙ ⲡⲡⲟⲗⲉⲙⲟⲥ ⲡⲉⲛⲧⲁϥⲣⲡⲙⲁ ⲙⲙⲱⲩ̈ⲥⲏⲥ ϩⲛ ⲛⲉⲡⲣⲟⲫⲏⲧⲓⲁ ⲡⲁⲓ ⲉⲛⲧⲁϥϣⲱⲡⲉ ⲕⲁⲧⲁ ⲡⲉϥⲣⲁⲛ ⲛⲛⲟϭ ⲉϫⲛ ⲡⲉⲩϫⲁⲓ ⲛⲛⲉϥⲥⲱⲧⲡ ⲉϫⲓⲕⲃⲁ ϩⲛ ⲛϫⲁϫⲉ ⲉⲧⲧⲱⲟⲩⲛ ⲉϫⲱⲟⲩ ϫⲉ ⲉϥⲉϯⲕⲗⲏⲣⲟⲛⲟⲙⲓⲁ ⲙⲡⲓ︤ⲏ︦ⲗ︥ 2 ⲛⲑⲉ ⲉⲛⲧⲁϥϫⲓⲉⲟⲟⲩ ϩⲙ ⲡⲉϥϥⲓ ⲉϩⲣⲁⲓ ⲛⲛⲉϥϭⲓϫ ϩⲙ ⲡⲧⲣⲉϥⲥⲟⲟⲩⲧⲛ ⲉⲃⲟⲗ ⲛⲧⲥⲏϥⲉ ⲉϫⲛ ⲙⲡⲟⲗⲓⲥ 3 ⲛⲓⲙ ⲡⲉⲛⲧⲁϥⲱϩⲉⲣⲁⲧϥ ϩⲁⲧⲉϥϩⲏ ⲛⲧⲉⲓϩⲉ ⲡϫⲟⲉⲓⲥ ⲅⲁⲣ ⲡⲉϯⲛⲉ ⲛⲁϥ ⲛⲛⲉⲧϯ ⲟⲩⲃⲏϥ 4 ⲙⲏ ϩⲛ ⲧⲉϥϭⲓϫ ⲁⲛ ⲁⲡⲣⲏ ⲧⲟⲟⲧⲉ ⲉⲡⲁϩⲟⲩ [……ϩ]ⲟⲟⲩ ⲣⲥⲛⲁⲩ 5 [ⲁϥⲉⲡⲓ]ⲕⲁⲗⲉⲓ ⲙⲡϫⲟⲉⲓⲥ ⲛⲛϭⲟⲙ ⲡⲉⲧϫⲟⲥⲉ ϩⲙ ⲡⲧⲣⲉϥⲑⲗⲓⲃⲉ ⲛⲛϫⲁϫⲉ ⲉⲧⲙⲡⲉϥⲕⲱⲧⲉ ⲁⲩⲱ ⲁⲡϫⲟⲉⲓⲥ ⲥⲱⲧⲙ ⲉⲣⲟϥ ϩⲛ ϩⲛⲱⲛⲉ ⲛⲭⲁⲗⲁⲍⲁ ⲛⲛⲟϭ ⲛϭⲟⲙ 6 ⲁϥⲉⲓⲛⲉ ⲙⲙⲟⲟⲩ ϩⲙ ⲡⲡⲟⲗⲉⲙⲟⲥ ⲉϫⲛ ⲟⲩϩⲉⲑⲛⲟⲥ ⲁⲩⲱ ⲁϥⲧⲁⲕⲟ ⲛⲛⲉⲧⲟⲩⲃⲏϥ ϩⲙ ⲡⲉⲩⲉⲓ ⲉϩⲣⲁⲓ ϫⲉ ⲉⲣⲉⲛϩⲉⲑⲛⲟⲥ ⲉⲓⲙⲉ ⲉⲧⲉⲩⲡⲁⲛϩⲟⲡⲗⲓⲁ ϫⲉ ⲉⲣⲉⲡⲉϥⲡⲟⲗⲉⲙⲟⲥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲕⲁⲓ ⲅⲁⲣ ⲁϥⲟⲩⲁϩϥ ⲛⲥⲁ ⲟⲩϫⲱⲱⲣⲉ 7 ⲁⲩⲱ ⲁϥⲉⲓⲣⲉ ⲛⲟⲩⲛⲁ ϩⲛ ⲛⲉϩⲟⲟⲩ ⲙⲙⲱⲩ̈ⲥⲏⲥ ⲛⲧⲟϥ ⲙⲛ ⲭⲁⲗⲉⲃ ⲡϣⲏⲣⲉ ⲛⲓⲉⲫⲟⲛⲏ ⲁⲩⲱϩⲉⲣⲁⲧⲟⲩ ⲟⲩⲃⲏⲩ ⲉⲕⲱⲗⲩⲉ ⲙⲡⲗⲁⲟⲥ ⲉⲡⲛⲟⲃⲉ ⲁⲩⲱ ⲉⲧⲁⲗϭⲟ ⲙⲡⲉⲕⲣⲙⲣⲙ ⲛⲧⲡⲟⲛⲏⲣⲓⲁ 8 ⲁⲩⲱ ⲛⲧⲟⲟⲩ ⲛⲉ ⲛⲧⲁⲩⲟⲩϫⲁⲓ ⲙⲡⲉⲥⲛⲁⲩ ⲉⲃⲟⲗ ϩⲛ ⲥⲉ ⲛⲧⲃⲁ ⲙⲡⲉⲍⲟⲥ ⲉϫⲓⲧⲟⲩ ⲉϩⲟⲩⲛ ⲉⲧⲉⲕⲗⲏⲣⲟⲛⲟⲙⲓⲁ ⲉⲩⲕⲁϩ ⲉϥϣⲟⲩⲉⲉⲣⲱⲧⲉ ⲉⲃⲟⲗ ϩⲓ ⲉⲃⲓⲱ 9 ⲁⲡϫⲟⲉⲓⲥ ϯⲟⲩϭⲟⲙ ⲛⲭⲁⲗⲉⲃ ⲁⲥϭⲱ ⲛⲙⲙⲁϥ ϣⲁ ⲧⲉϥⲙⲛⲧϩⲗⲗⲟ ⲉⲧⲣⲉⲩⲁⲗⲉ ⲉϫⲛ ⲡϫⲓⲥⲉ ⲁⲩⲱ ⲁⲡⲉϥⲥⲡⲉⲣⲙⲁ ⲁⲙⲁ[ϩⲧⲉ ⲛⲟⲩⲕⲗⲏ]ⲣⲟⲛⲟⲙⲓⲁ 10 ϫⲉⲕⲁⲁⲥ ⲉⲣⲉⲛϣⲏⲣⲉ ⲧⲏⲣⲟⲩ ⲙⲡ︤ⲓ︦ⲏ︦ⲗ︥ ⲛⲁⲩ ϫⲉ ⲛⲁⲛⲟⲩⲟⲩⲁϩⲕ ⲛⲥⲁ ⲡϫⲟⲉⲓⲥ 11 ⲁⲩⲱ ⲛⲉⲕⲣⲓⲧⲏⲥ ⲡⲟⲩⲁ ⲡⲟⲩⲁ ϩⲙ ⲡⲉϥⲣⲁⲛ ⲛⲉⲧⲉⲙⲡⲉⲡⲉⲩϩⲏⲧ ⲡⲟⲣⲛⲉⲩⲉ ⲛϩⲏⲧⲟⲩ ⲁⲩⲱ ⲛⲉⲧⲉⲙⲡⲟⲩⲕⲟⲧⲟⲩ ⲉⲃⲟⲗ ⲙⲡϫⲟⲉⲓⲥ ⲉⲣⲉⲡⲉⲩⲣⲡⲙⲉⲉⲩⲉ ϣⲱⲡⲉ ϩⲛ ϩⲉⲛⲥⲙⲟⲩ 12 ⲁⲩⲱ ⲉⲣⲉⲛⲉⲩⲕⲁⲁⲥ ϯⲟⲩⲱ ⲉⲃⲟⲗ ϩⲙ ⲡⲉⲩⲙⲁ ⲁⲩⲱ ⲛⲥⲉϯⲡⲉⲩⲣⲁⲛ ⲛϣⲃⲉⲓⲱ ⲉϫⲛ ⲛⲉⲩϣⲏⲣⲉ ⲉⲧⲧⲁⲓⲏⲩ 13 ⲁⲩⲙⲉⲣⲉⲥⲁⲙⲟⲩⲏⲗ ϩⲓⲧⲛ ⲡⲉⲧϫⲟⲥⲉ ⲡⲉⲡⲣⲟⲫⲏⲧⲏⲥ ⲙⲡϫⲟⲉⲓⲥ ⲡⲉ ⲁϥⲕⲁⲑⲓⲥⲧⲁ ⲛⲧⲙⲛⲧⲣⲣⲟ ⲁⲩⲱ ⲁϥⲧⲱϩⲥ ⲛϩⲛⲁⲣⲭⲱⲛ ⲉϫⲛ ⲡⲉϥⲗⲁⲟⲥ 14 ⲁϥⲕⲣⲓⲛⲉ ⲛⲧⲥⲩⲛⲁⲅⲱⲅⲏ ⲙⲡⲛⲟⲙⲟⲥ ⲙⲡⲉⲧϫⲟⲥⲉ ⲁⲡϫⲟⲉⲓⲥ ϭⲛⲡϣⲓⲛⲉ ⲛⲓⲁⲕⲱⲃ 15 ⲁϥⲥⲟⲧⲡϥ ϩⲛ ⲧⲉϥⲡⲓⲥⲧⲓⲥ ⲙⲡⲣⲟⲫⲏⲧⲏⲥ ⲁⲩⲱ ⲁⲩⲥⲟⲩⲱⲛϥ ϩⲛ ⲧⲉϥⲣⲁⲥⲟⲩ ϫⲉ ϥⲛϩⲟⲧ ⲛⲁϥ 16 ⲁϥⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲛⲛϭⲟⲙ ϩⲙ ⲡⲧⲣⲉⲛⲉϥϫⲁϫⲉ ⲑⲗⲓⲃⲉ ⲙⲙⲟϥ ⲙⲡⲉϥⲕⲱⲧⲉ [ϩⲛ ⲟⲩⲡⲣⲟⲥ]ⲫⲟⲣⲁ ⲛϩⲓⲉⲓⲃ ⲛⲟⲩⲁⲙ[ⲉⲣⲱⲧⲉ] 17 ⲁⲩⲱ ⲁⲡϫⲟⲉⲓⲥ ϯϩⲣⲟⲩⲃⲃⲁⲓ ⲉⲃⲟⲗ [ϩⲛ] ⲧⲡⲉ ⲁⲩⲱ ⲁϥⲧⲣⲉⲩⲥⲱⲧⲙ ⲉⲧⲉϥⲥⲙⲏ ϩⲛ ⲟⲩⲛⲟϭ ⲛϩⲣⲟⲟⲩ 18 ⲁϥⲟⲩⲱϣϥ ⲛⲛⲟϭ ⲛⲧⲩⲣⲁⲛⲛⲟⲥ ⲁⲩⲱ ⲛⲁⲣⲭⲱⲛ ⲧⲏⲣⲟⲩ ⲛⲛⲉⲫⲩⲗⲓⲥⲧⲓⲉⲓⲙ 19 ⲁⲩⲱ ϩⲁⲑⲏ ⲉⲙⲡⲁⲧϥⲕⲟⲧϥ ⲛϣⲁⲉⲛⲉϩ ⲁϥⲣⲙⲛⲧⲣⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲓⲥ ⲙⲛ ⲡⲣⲣⲟ ϫⲉ ⲙⲡⲓϫⲓⲭⲣⲏⲙⲁ ⲛⲧⲛ ⲥⲁⲣⲝ ⲛⲓⲙ ϣⲁϩⲣⲁⲓ ⲉⲩⲧⲟⲟⲩⲉ ⲁⲩⲱ ⲙⲡⲉⲗⲁⲁⲩ ⲛⲣⲱⲙⲉ ⲉⲛⲕⲁⲗⲓ ⲛⲁϥ 20 ⲁⲩⲱ ⲁϥⲡⲣⲟⲫⲏⲧⲉⲩⲉ ⲙⲛⲛⲥⲁ ⲧⲣⲉϥⲙⲟⲩ ⲁϥϫⲱ ⲉⲡⲣⲣⲟ ⲙⲡⲉϥⲙⲟⲩ ⲁⲩⲱ ⲁϥϫⲓⲥⲉ ⲛⲧⲉϥⲥⲙⲏ ⲉⲃⲟⲗ ϩⲙ ⲡⲕⲁϩ ϩⲛ ⲟⲩⲡⲣⲟⲫⲏⲧⲓⲁ ⲉϥⲱⲧⲉ ⲉⲃⲟⲗ ⲛⲧⲁⲛⲟⲙⲓⲁ ⲙⲡⲗⲁⲟⲥ